एकालाप शैलीमा बाधिएको यस पुस्तकमा एउटी महिलाको अन्तर चेतनाको परिदृश्यलाई उजागर गरिएको छ; जसले छोरी, प्रिया, पत्नी अनि आमाको बहुआयामिक भूमिकामा अभिनय गर्दै बाँचेकी हुन्छे र पनि निरन्तर एकाकीपनको भावमा ठोक्किँदै बगेको झरना जस्तै हुन्छे । पुस्तकले एउटी महिला जो वास्तवमा समाजद्वारा तोकिएको भूमिकामा मात्र समाहित हुन बाध्य छे; समाजमा उसको निजत्वको पनि कुनै भूमिका छ कि छैन भन्ने प्रश्न गर्दछ । यो कृतिले महिलाले आफ्ना उद्देश्यलाई आफैले पूरा गर्ने प्रयत्न गर्नु पर्छ भन्नेतर्फ संकेत गर्दछ ।

भुवन कोइरालाका नामले सुरुमा साहित्यिक जगतमा परिचित भुवन ढुङ्गानाको जन्म विराटनगरमा भएको हो । बाल्यकालको शिक्षादीक्षा बनारसमा पाएकी उनले विश्वभारती विश्वविद्यालय, शान्ति निकेतनबाट नृत्य र बङ्गाली भाषामा स्नातक र त्रिविबाट अङ्ग्रेजी साहित्यमा स्नातकोत्तर गरेकी छन् । पञ्चायतकालमा 'सिउँडी' साहित्यिक त्रैमासिकको सम्पादनसमेत गरेकी उनको युद्धको घोषणा गर्नुभन्दा अघि र 'धर्मविम्ब' कथासङ्ग्रह प्रकाशित छन् । बीपी कोइराला साहित्य सम्मानलगायत थुप्रै पुरस्कारप्राप्त उनको यो पहिलो उपन्यास हो ।